មន្ត្រីនៃសមាគមខ្មែរដើម្បីអភិវឌ្ឍន៍ជនបទកម្ពុជា (KAFDOC) បានសុំឲ្យមន្រ្តីទេសចរណ៍ខេត្តក្រចេះចាប់ផ្តើមពង្រឹងវិស័យនេះឡើង វិញ ពិសេសតំបន់អភិរក្សសត្វផ្សោត ព្រោះលោកបានទទួលរបាយការណ៍មកថាមានសត្វផ្សោតស្លាប់កន្លងមក ដោយសារតែការថែរក្សាបរិស្ថានទឹកមិនបានល្អ ហើយថាទេសចរឆ្នាំនេះមានការថយចុះជាងឆ្នាំទៅ។
ប្រធានមន្ទីរទេសចរណ៍ខេត្តក្រចេះ គឺលោក អៀ ម៉ុងដែន បានឲ្យដឹងថា ទេសចរណ៍ដែលមកទស្សនាជាសំខាន់នៅខេត្តក្រចេះគឺសត្វផ្សោតដែលជា អម្បូរត្រីទឹកសាបដ៏កម្រស្ទើរបាត់ពូជទៅហើយនោះ។
លោក អៀ ម៉ុងដែន អះអាងថា ការថយចុះនៃទេសចរណ៍ក្នុងឆ្នាំនេះគឺពាក់ព័ន្ធទៅនឹងសភាពការណ៍ពិភពលោកផងដែរ ៖ «ឆ្នាំ ទៅដូចធ្លាក់ ៤% ដូច ១ម៉ឺន២ពាន់ជាង ក្រោម ១ម៉ឺន៣ពាន់ គ្រាន់ថាធ្លាក់ ៤% មកវិញ។ ពិបាកនិយាយណាស់អាហ្នឹងវាយោងទៅលើសភាពការណ៍រួមតែម្ដង។ បើភ្ញៀវនៅក្រចេះវាច្រើនតែភ្ញៀវពួកអឺរ៉ុបដែលមកមើលផ្សោត ដល់តែមកជួបវិបត្តិហិរញ្ញវត្ថុ ហើយវាបូកផ្សំ វាជះឥទ្ធិពលរួមមកតែម្ដង ខ្ញុំដូចពិបាកនិយាយដែរ»។
ប្រធានមន្ទីរទេសចរណ៍បានបញ្ជាក់បន្ថែមថា ក្រុមអភិរក្សបានខិតខំប្រឹងប្រែងយ៉ាងខ្លាំងណាស់ ដោយមិនអាចបន្ទោសថា ទេសចរណ៍ធ្លាក់ចុះដោយសារបរិស្ថានទឹកមានការបំពុល ឬការគ្រប់គ្រងមិនដិតដល់បានឡើយ។
ប្រធានខណ្ឌជលផលខេត្តគឺលោក សៀន គិន បានឲ្យដឹងថា មានការរិះគន់ខ្លះថាមានសត្វផ្សោតស្លាប់កន្លងមកដោយសារតែការថែ រក្សាបរិស្ថានទឹកមិនបានល្អ ប៉ុន្តែលោកបានបដិសេធដោយលើកឡើងថា ចាប់ពីខែមករា ដល់ខែមីនា មានកូនផ្សោតចំនួនបីក្បាលបានស្លាប់ដោយសារជាប់មងរបស់ប្រជាពលរដ្ឋ ដែលខ្វះការយល់ដឹងក្នុងការអភិរក្សសត្វផ្សោតដ៏កម្រនេះ។
លោក សៀន គិន ថ្លែងយ៉ាងដូច្នេះ ៖ «ការស្លាប់ហ្នឹងតិចបំផុត ឆ្នាំនេះតែបីក្បាល តាំងពីដើមឆ្នាំមកដល់ពេលនេះ។ ស្លាប់ដោយសារមង ផ្សោតមានចំនួនតូចៗដែរ ជាប់ហ្នឹងគឺវាស៊ីចំណីនៅទឹករាក់ ដល់ពេលធំៗវាស៊ីចំណីទឹកជ្រៅ។ ទឹកជ្រៅវាគេចផុត តែដោយសារភាពចន្លោះប្រហោង ហើយមានបងប្អូនប្រជាពលរដ្ឋនៅតាមមូលដ្ឋានហ្នឹង គាត់លួចដាក់បន្តិចបន្តួចក្នុងព្រៃតាមតំបន់មេគង្គលើហ្នឹង ធ្វើឲ្យប៉ះពាល់កូនៗផ្សោតដែលបានស្លាប់ ៣ក្បាលហ្នឹង»។
លោក សៀន គិន បានបញ្ជាក់បន្ថែមថា សត្វផ្សោតប្រមាណជាង១៥០ក្បាលដែលកំពុងរស់នៅតាមដងទន្លេមេគង្គលើ ផ្ទៃទឹកប្រមាណ ២០០គីឡូម៉ែត្រពីខេត្តក្រចេះដល់ព្រំប្រទល់ឡាវ ត្រូវបានគ្រប់គ្រងយ៉ាងតឹងរ៉ឹងបំផុតដោយគណៈកម្មការប្រាំស្ថាប័ន មានអាជ្ញាធរដែនដី ជលផល ប៉េអឹម ប៉ូលិសនិងសហគមន៍មូលដ្ឋាន។
គណៈកម្មការក៏បានរៀបចំការពារតំបន់ហាមឃាត់មិនឲ្យប្រជាពលរដ្ឋ ប្រកបរបរនេសាទនៅតំបន់ហាមឃាត់ដើម្បីការពារសុវត្ថិភាពសត្វផ្សោត និងរក្សាចំណីសម្រាប់សត្វផ្សោតផងដែរ។
លោក សៀន គិន មានប្រសាសន៍បន្ថែមដូច្នេះថា ៖ «ទំនាក់ទំនងជាមួយ NGO មូលដ្ឋាន NGO ហ្នឹង ដើម្បីគាត់ទៅជួយបង្កើនមុខរបរ បញ្ចៀសការធ្វើនេសាទក្នុងតំបន់មេគង្គលើ។ ដោយសារការព្រួយបារម្ភនេះហើយ ឯកឧត្ដមមានយុទ្ធសាស្រ្ដ គឺចាប់ពីតំបន់ក្រចេះឡើងលើ អត់ឲ្យថា ការធ្វើនេសាទដោយមង ហើយអត់ឲ្យបាំងអូរ ដើម្បីឲ្យត្រីកើនឡើងនៅតំបន់អន្លង់ត្រីដែលជាអន្លង់ត្រីតំបន់ មេគង្គក្រចេះទៅស្ទឹងត្រែង ដើម្បីឲ្យផ្សោតធ្វើចំណី»។
ស្ត្រីដែលមានលំនៅក្បែររមនីយដ្ឋានកាំពីជាជម្រកសត្វផ្សោតបាន និយាយអំពីការចាប់អារម្មណ៍របស់ទេសចរនានាដែលបានទៅកាន់ទីសត្វ ផ្សោតនោះថា ចំពោះអ្នកខ្លះដែលពុំធ្លាប់ស្គាល់សត្វផ្សោតសោះនោះ មកហើយហាក់ដូចខំប្រឹងពិនិត្យយ៉ាងដិតដល់សម្បើមណាស់ ហាក់ដូចជាមិនចង់ឲ្យឃ្លាត ៖ «ចំពោះពួកគាត់ នៅពេលដែលឃើញគាត់មកហ្នឹង គាត់តែងតែរីករាយ ហើយពេលត្រឡប់ទៅវិញ គាត់តែងតែទិញជាអនុស្សាវរីយ៍ដូចជាផ្សោតតាំងលើតុ ឬក៏សម្រាប់ជាបន្តោងសោផ្សេងៗទៅដែរ។ ហើយភាគច្រើន ភ្ញៀវចំណាយពេលយ៉ាងច្រើននៅពេលដែលគាត់ជិះទូកទៅមើល ដូចជាមិនចង់ឲ្យម្ចាស់ទូកត្រឡប់ទៅវិញទេ ចង់នៅមើលផ្សោតហ្នឹងថែមទៀត»។
សត្វផ្សោតជាសត្វបំបៅកូនដោយទឹកដោះរហូតដល់ ១៨ខែ ទើបលែងបៅហើយបីឆ្នាំទើបកូនម្តង។
មន្ត្រីនៃអង្គការ KAFDOC គឺលោក ថាច់ មេត្រី បានលើកឡើងថា ទេសចរថយចុះគឺពាក់ព័ន្ធទៅនឹងសេដ្ឋកិច្ចពិភពលោក ហើយក៏បណ្តាលមកពីខេត្តក្រចេះមិនបានពង្រីកតំបន់ទេសចរណ៍ ដែលនៅសេសសល់ផ្សេងទៀតធ្វើឲ្យទេសចរដែលចំណាយប្រាក់ច្រើនអាចមក មើលបានតែសត្វផ្សោតមួយមុខហើយទៅវិញ ហើយការចំណាយប្រាក់លើសេវាផ្សេងពុំទាន់មានការត្រួតពិនិត្យបាន ល្អនៅឡើយ។
លោក ថាច់ មេត្រី មានប្រសាសន៍ដូច្នេះថា ៖ «មើលទៅដូចថា បណ្ដាលមកពីប្រជាពលរដ្ឋមួយចំនួនដែរ។ ក្នុងនោះដូចជាប្រជាពលរដ្ឋបម្រើសេវាកម្មមួយចំនួន ដូចជាការលក់ដូរអីជាដើម។ ហើយការបម្រើសេវាកម្មដឹកជញ្ជូនអីជាដើមហាក់បីដូចជាមិនទាន់បាន គោរពទៅតាមគោលការណ៍ឲ្យបានច្បាស់លាស់ ជាពិសេសដូចមានការលក់សោឲ្យភ្ញៀវអីអ៊ីចឹងខ្លះទៅ ការដឹកជញ្ជូនអីហ្នឹងក៏មានការយកថ្លៃលើសធម្មតាអីអ៊ីចឹងទៅ ក៏វាជាកត្តាមួយដែលធ្វើឲ្យបាត់បង់នូវចំនួនភ្ញៀវទេសចរពី មជ្ឈដ្ឋានផ្សេងៗដែរ។ ជាក់ស្ដែងមួយទៀត គឺដោយសារតែខេត្តក្រចេះរបស់យើង ភ្ញៀវទេសចរភាគច្រើនរិះគន់ថា មកមើលតែផ្សោតមួយមុខ ហើយវិលត្រឡប់ទៅវិញ អ៊ីចឹងហើយបានជាភ្ញៀវទេសចរមួយចំនួនត្រូវថយមែន បើយើងប្រៀបធៀបទៅនឹងតំបន់ផ្សេងៗ គេមិនមែនមានតែមួយមុខដូចនៅក្រចេះអ៊ីចឹងទេ»។
លោក ថាច់ មេត្រី បានបញ្ជាក់ថា ទេសចរជាវិស័យមួយដែលងាយប្រមូលថវិកាណាស់ បើសិនជាការរៀបចំទៅមានការអភិវឌ្ឍបានល្អសមរម្យដូចជាតំបន់សត្វ ផ្សោតជាដើមដែលជាកន្លែងងាយស្រូបយកប្រាក់ជាទីបំផុតដោយលោកសំអាង ថា ទេសចរបរទេសគ្រាន់តែចំណាយពេលវេលាដើម្បីថតរូបសត្វផ្សោតតែ ប៉ុណ្ណោះក៏ត្រូវចំណាយប្រាក់យ៉ាងច្រើនមកខេត្តក្រចេះដែរ៕
From:
0 comments:
Post a Comment