សកលវិទ្យាល័យមានជ័យកំពុងជួបប្រទះវិបត្តិ ដោយសិស្សសាលាមួយចំនួននៅសកលវិទ្យាល័យនេះបាននាំគ្នាឈប់រៀន ដោយសារពួកគេខ្វះលទ្ធភាពក្នុងការរកថវិកាបង់ថ្លៃសាលាប្រចំាឆ្នាំ មិនបាននិងសាលាអត់ថវិកាបើកឲ្យគ្រូបង្រៀន។
ប្រភពពីក្រុមគ្រូបង្រៀន សិស្ស និស្សិត នៃសកលវិទ្យាល័យមានជ័យ បានថ្លែងដោយមិនបញ្ចេញឈ្មោះនៅព្រឹកថ្ងៃច័ន្ទ ទី១៣ ខែកក្កដា ថា ពួកគេកំពុងជួបប្រទះបញ្ហាជីវភាពប្រចាំថ្ងៃ ដោយសារតែប្រាក់ឧបត្ថម្ភរបស់សាលាប្រចាំខែជាច្រើនខែមិនទាន់បើក បាន។ ក៏ប៉ុន្តែប្រភពទាំងនោះមិនបានបញ្ជាក់ពីចំនួនប៉ុន្មានខែជាក់លាក់ ទេ។
និស្សិតឆ្នាំទី២នៃសកលវិទ្យាល័យមានជ័យមួយរូបបានថ្លែងថា ទទឹមនឹងបញ្ហាសាលាមិនទាន់បើកប្រាក់ឧបត្ថម្ភឲ្យគ្រូបង្រៀន សិស្ស និស្សិតមួយចំនួន ក៏កំពុងឈប់រៀនដែរ ដោយពួកគេខ្វះលទ្ធភាពក្នុងការរកលុយបង់ថ្លៃសាលា ៖ «ខ្លះណា អត់មានលុយបង់ក៏ឈប់ទៅ ខ្លះណាសិស្សមួយចំនួនរកលុយខ្លួនឯង បង់ខ្លួនឯងអ៊ីចឹងទៅ ដូចថា រកមិនទាន់រៀនដែរ យើងត្រូវបង់សាលាផង យើងត្រូវការចំណាយរៀនផង និងទិញឯកសារពីរៀន»។
សកលវិទ្យាធិការនៃសកលវិទ្យាល័យមានជ័យ លោក តូច ជឿន បានថ្លែងថា ក្នុងចំណោមបុគ្គលិកសិក្សា ១១២នាក់ នៃសកលវិទ្យាល័យមានជ័យ គឺបានទទួលប្រាក់ខែពីក្រសួងអប់រំរាល់ខែ ប៉ុន្តែប្រាក់ឧបត្ថម្ភប្រចាំខែសម្រាប់គ្រូបង្រៀនម្នាក់ ពី ១០០ដុល្លារ ទៅ ១៧០ដុល្លារ ទើបមិនមានបើកឲ្យប្រហែលរយៈពេលជាង ១ខែប៉ុណ្ណោះ ដោយសារសិស្សសាលាបង់លុយឲ្យយឺត។
លោក តូច ជឿន មានប្រសាសន៍ដូច្នេះថា ៖ «ប៉ុន្តែប្រាក់ឧបត្ថម្ភយឺត ប្រហែលជា ១ខែ ព្រោះសិស្សវាបង់យឺតដែរ យើងបង់បន្ថែមឲ្យបុគ្គលិកបន្ថែមពីលើដើម្បីឲ្យគាត់អាចមានលុយ ចាក់សាំង ទិញអង្ករ មានអីៗហូបអ៊ីចឹង»។
ទាក់ទងនឹងការឈប់រៀនរបស់សិស្ស និស្សិតវិញ លោក តូច ជឿន មិនបានបញ្ជាក់ថា មានសិស្សនិស្សិតនៃសកលវិទ្យាល័យមានជ័យប៉ុន្មាននាក់ ដែលបានឈប់រៀនដោយសារអត់ថវិកាបង់ថ្លៃសាលា គឺគ្រាន់តែអះអាងថា សាលាបានផ្តល់ការអនុគ្រោះក្នុងការពន្យារពេលបង់ជាតំណាក់កាលវិញ។
ប្រធានសមាគមគ្រូបង្រៀនកម្ពុជាឯករាជ លោក រ៉ុង ឈុន បានថ្លែងថា បញ្ហាខាងលើនេះ គឺជាការទទួលខុសត្រូវរបស់សកលវិទ្យាធិការ។ ចំណែកឯបញ្ហាសិស្សអត់លុយបង់ថ្លៃសាលាគឺបណ្តាលមកពីវិបត្តិហិរញ្ញ វត្ថុសកលលោកដែលធ្វើឲ្យការរកចំណូលរបស់គ្រួសារសិស្សមានការ ធ្លាក់ចុះ។
ទាក់ទិននឹងបញ្ហានេះ លោក រ៉ុង ឈុន បានអំពាវនាវដូច្នេះថា ៖ «ខ្ញុំ អំពាវនាវដល់សកលវិទ្យាល័យទាំងអស់ ទាំងឯកជន ក៏ដូចជារដ្ឋត្រូវមានញ្ចុះតម្លៃសម្រាប់និស្សិតដើម្បីផ្តល់ឲ្យ ឱកាសឲ្យនិស្សិតបានបន្តការសិក្សាឲ្យបានចប់»។
សូមជម្រាបជូនថា សកលវិទ្យាល័យមានជ័យមានទីតាំងស្ថិតក្នុងក្រុងសិរីសោភ័ណ ខេត្តបន្ទាយមានជ័យ បានចាប់ផ្តើមដំណើរការកាលពីឆ្នាំ២០០៨ ដោយក្នុងនោះ មានមហាវិទ្យាល័យចំនួន៥ ស្មើ ១៨ថ្នាក់ មាននាយកដ្ឋានចំនួន១៤ មានសិស្ស និស្សិតសរុប ១.៣០០នាក់ ក្នុងនោះអ្នកទទួលអាហារូបករណ៍ពីរដ្ឋាភិបាលចំនួន ៦០០នាក់៕
From:
សកលវិទ្យាល័យមួយនៅបន្ទាយមានជ័យជួបប្រទះវិបត្តិ
Written By vibykhmer on Tuesday, July 14, 2009 | 5:53 AM
PHOTO HERE
DESCRIPTION HERE
0 comments:
Post a Comment